SAN MIGUEL, LEYTE – Usa nga insidente han panmusil an nahipatik ha Brgy. Malpag, San Miguel, Leyte dida han mga nakalabay nga adlaw kun diin, usa an kumpirmado nga patay mahuman ini maigo ha ulo.
Usa nga 51-anyos an biktima, fishpond caretaker, gin-anak ha Leyte, Leyte ngan residente han Brgy, Malpag, San Miguel, Leyte samtang ginkilala naman an suspek kan alyas “Mak-mak”, 41-anyos an pangidaron ngan residente gihapon han barangay.
Basar han imbestigasyon, nga samtang nag-iirignom an biktima ngan an suspek kaupod an unom nga iba pa in nagkamayda hin mapaso nga argumento an duha, rason han pagpabuto han suspek han iya pusil ha biktima.
Dayon naman nga kumaligiw an suspek gamit han iya motorsiklo kun diin, dayon gihapon nga naglunsar an San Miguel MPS hin hot pursuit ngan dragnet operation agud matudlok ngan madakop an suspek.
Nabaruan nga nagkamayda hin delito an duha dida han mga nakalabay, kun diin ginkikita gihapon ini nga usa nga anggulo han mga kapulisan nga rason han pagpusila han suspek ha biktima.
Samtang, nabaruan naman nga aadi ha Tacloban City an urhi nga lokasyon han suspek kun diin, padayon ini ginbibiling han mga kapulisan. Nanawagan an mga otoridad nga kun hin-o man an may impormasyon o nakakita hin kaduda-duda nga indibidwal in dayon makipag-sumpayan ha kahirani nga stasyon han police.
