PALO, LEYTE – Dakop han mga kapulisan han Palo Municipal Police Station an suspek nga nagpapaluyo han usa nga insidente han panawtaw ha Brgy. Pawing, Palo, Leyte dida han mga nakalabay nga adlaw.
Ginkilala an biktima kan alyas “Bobby”, aada ha legal nga pangidaron ngan an supek naman nga hi alyas “Bogii,” 29-anyos, residente han mao nga lugar.
Basar han imbestigasyon, nga parehas aada ha impluwensya han makahurubog nga irimnon an biktima ngan suspek nga kun diin nagkamayda hira hin mapaso nga argumento ngan gin-ayat pa han suspek an biktima hin away.
Tigda nala an biktima gin-atake han suspek gamit an usa nga kitchen knife nga nagresulta hin mga kasamdan ha nawong ngan ulo han biktima. Dayon nga kumaligiw an suspek mahuman, pero nadakop naman ini dayon ha ginbuhat nga hot pursuit operation han mga rumesponde nga kapulisan mahuman hira makakarawat han report.
Nakuha han mga otoridad ha arestado nga suspek an 12-inch nga pisaw nga gintutuohan nga gingamit ha krimen.
Gindara naman an biktima ha kahirani nga ospital para ha kaangayan nga atensyon medikal ngan pagpapaupay.
Samtang, nakapaslak na an suspek ha Palo Municipal Police Station kun diin maatubang naman ini hin kaangayan nga kaso.
