TACLOBAN CITY – Posible pasakahan hin kaso nga cyberlibel han Traffic Operations Management, Enforcement and Control Office o TOMECO an indibidwal nga nag-video ha usa nga traffic enforcer ngan nagbuhat hin eskandalo ha kadalanan.
Sumala kan TOMECO Operation and Enforcement Unit, Restituto Reglos nga klaro nga “nakakatamay” ngan “ginbu-bully” han nagvi-video an traffic enforcer nga nagbubuhat la han iya trabaho.
Dugang hini nga karuyag ipasabot han indibidwal nga kinahanglan sasrahid an pani-nicket, pero insakto naman an ginbubuhat nga trabaho han enforcer nga tagan an mga sarakyan nga may pagtalapas ha balaud trapiko hin ticket.
Sumala pa kan Reglos, nga nagbuhat na hira hin mga pitad sugad han pagpa-blotter ngan pagsumite han video ha mga gintutu-inan kun sakob ba an ginbuhat nga harassment ha enforcer ha cyber libel nga kaso.
Manunumduman nga nagkamayda gihapon mapaso nga argumento dida han nakalabay, han usa nga traffic enforcer ngan tricycle driver may paghisumpay han panicket pero naresolbar naman ini dayon mahuman umaro hin pasaylo an kada-tagsa ha barangay.
Samtang dugang pa ni Reglos nga igdu-duso nira ini nga kaso ngan kihaan an indibidwal mahitungod nga mas grabe an ginbuhat yana nga pagpaka-alo ha traffic enforcer.
