TACLOBAN CITY – Mas hitaas an nagin ihap han mga nagamit hin mga kontraseptibo ha rehiyon yana nga tuig kumpara han mga nakalabay nga tuig.
Sumala kan Director Elnora Pulma, Regional Director hiton Commission on Population and Development (PopCom) Regional Office 8, mas mauru-upay daw ine nga ihap mahitungod nga nagtitikadamo na iton mga mag-asawa o live-in an nagkakamay-ada na hin maupay nga family planning.
Tikang han 2017 in nagawas ha survey nga ginbuhat hiton National Demographic Health Survey nga damu na iton mga kababayin-an nga nagamit hin magkaduru-dilain nga kontraseptibo o pamaagi para magkamay-ada hin family planning kun diin 58% han nasabi nga ihap an nagamit hin contraceptives.
Kumpara han nakalabay nga tuig-2017 in mas humitaas pa an ihap han mga kababayin-an nga nagamit hin contraceptives kun diin ha pagkayana in ada ine ha 65.7%.
Maupay naman daw nga indikasyon an nasabi nga paghitaas han porsyento mahitungod nga nakikita na han mga mag-asawa o live-in an importansya han pagkakamay-ada hin maupay nga family planning.
