Nagpagawas kakulop nga adlaw, Oktubre 8, hin imbitasyon an Independent Commission for Infrastructure (ICI) agud kaatubangon ni anay House Speaker Martin Romualdez ha komisyon ngan igpaangbit an nahitabo ha budget insertions ngan Department of Public Works and Highways (DPWH) flood control projects ha panahon han iya pagmamangulo.
Samtang, hi anay Rep Zaldy Co naman in ginpa-subpoena na han komisyon agud umatubang gihapon kasumpay naman ha iya nahibabaruan kumo anay Chairman han House Committee on Appropriations.
Sumala kan ICI Spokesperson Brian Keith Hosaka, kun dire umatender, posible nga magpabulig na ha korte agud igpa-contempt an mga indibidwal mahitungod nga ha presente in waray hira kapas para hine.
Ha maabot nga Oktubre 14 naman nakataan nga umatubang an duha nga indibidwal.
Ha lain nga bahin, ginsigurado han komisyon nga magpapadayon ine ha pagdudumara han imbestigasyon kasumpay ha mga iregularidad ha mga flood control project han gobyerno, ha kaluyo han kawaray hine kapas nga mag-cite hin contempt ha mga indibidwal nga gin iimbestigahan.
Sumala kan Hosaka, bisan man kun pagrekomenda la an kapas han komisyon in aktibo la gihapon hine nga gin iimbestigahan an mga posible nga dabi ha korapsyon.
Dugang pa hine, panuyo han ICI nga makab-ot an kamatuuran ngan dire magamit an proseso para ha politikal nga interes.
Sanglit imbes nga livestream, nagpapagawas nala hin litrato tikang ha sulod han pagdungog an komisyon kumo kaparte han transparensiya.
