NATIONAL – Ginhangyo han prosecutor han International Criminal Court (ICC) ha Pre-Trial Chamber I han korte nga igbasura an apela han defense team ni anay Presidente Rodrigo Duterte nga dire la anay ig dayun an ruling o desisyon han iya interim release o temporaryo nga paggawas.
Igin rason ni Deputy Prosecutor Mame Mandiaye Niang kun diin an defense team mismo an pumuli kun san-o nira igsasalawad an aplikasyon para ha dayun nga interim release han anay presidente bisan kun dire kompleto an iginpasa nga redacted submission han defense.
Sanglit dire daw angay tugutan nga suspendihon an pag-isyu han desisyon para ha pagprubar nga mapun-an o mabaton an submission han defense.
Manununduman gudman nga syahan nga ginhangyo han legal team han anay presidente nga dire la anay ig dayun an desisyon ha ira hangyo nga interim release kutob ha makompleto daw han defense an ngatanan han mga kinahanglan nga impormasyon.
Syahan na umapela an counsel ni anay Presidente Duterte para ha ira interim release ha usa nga waray na ngarani nga nasud nga nagpahayag nga daw hin “advance at principled agreement” para karawton hiya.
Usa ha mga rason nga gintudlok para tugutan an interim release han anay presidente in an iya nagtitikahinay nga panlawas ngan kalagas na, samtang naghuhulat ha confirmation hearing han gin aakusa nga crimes against humanity kontra ha iya may paghisumpay ha mga pagpatay ha ilarom han war on drugs ha Setyembre 23 ha The Hague, Netherlands.
