Gin aprubahan han International Criminal Court (ICC) Trial Chamber III an pagpapa-freeze han salapi nga nakumpiska hadto kan anay Presidente Rodrigo Duterte mahuman hiya maaresto ngan dad-on ha kustodiya han international tribunal dida han Marso 2025.
Ini in mahuman hangyuon han prosekusyon nga ma-access an iya mga personal nga gamit ngan ig-freeze an anuman nga salapi nga dara han anay presidente.
Subay ha mga dokumento nga ginpagawas han ICC dida han Biyernes, Hunyo 27, 2026, gin paburan han korte an mosyon han prosekusyon nga igpadayon an pag-freeze ha anuman nga kantidad nga nakuha tikang han Duterte ha panahon han iya pagka-aresto.
Syahan na nga gin kwestyon han kampo ni Duterte an nasabi nga pitad han Trial Chamber III.
Subay ha depensa, dire na kinahanglan himuon han prosekusyon an ira hangyo mahitungod nga aadto ha kustodiya han ICC Registry an nasabi nga salapi.
Duon pa, waray ini magigin epekto ha presente nga pagdungog han kaso.
Waray naman igbuyagyag han ICC kun pira an kantidad han salapi nga nakuha tikang ha anay presidente.
Samtang, naghangyo gihapon an prosekusyon nga matagan hin akses ha iba pa nga mga butang nga nakumpiska tikang kan Dutete ha panahon han iya pag-aresto.
Bisan man kun waray bumaribad an depensa ha panginano han pira ha mga nakuha nga kagamitan, gin hangyo han abogado ni Duterte nga hi Atty. Peter Haynes nga dire tugutan an prosekusyon nga panginanuon an mga susi ngan iba pa nga personal nga presente ada ha kostusiya han ICC Registry.
Subay ha depensa, waray supriyente nga basaranan an prosekusyon agud igsumpay an mga susi ha mga krimen nga gin iimbestigahan o ha anuman nga propyedad nga may paghisumpay ha kaso.
Iginduon hini nga dire pwede magdumara hin anuman nga panginano agud magbiling hin ebidensya nga maghahatag hin rason ha kaso.
Ginhangyo gihapon han kampo ni Duterte nga kun tutugutan an panginano ha iba pa nga nakumpiska nga gamit, nga siguraduhon han prosekusyon nga mapoproteheran an mga personal nga impormasyon han anay presidente ngan han iya pamilya nga waray koneksyon ha ginbubuhat nga imbestigasyon.
