TACLOBAN CITY – Dakop han mga kapulisan an usa nga lalaki, mahuman ini manhold-up ha Brgy. 6 Sto. Nino St. Tacloban City dida han mga nakalabay nga mga gab-i.
Ginkilala an suspek kan alyas “Mel”, aada ha legal nga pangidaron, waray trabaho, ngan residente han Brgy. 6-A, Sto. Nino St. Tacloban City samtang an biktima naman in ginkilala kan alyas “Jovy”, aada gihapon ha legal nga pangidaron, usa nga fruit vendor ngan residente han Babatngon, Leyte.
Sumala ha imbestigasyon, samtang ti-uli an biktima ngan nagbabaktas ha mao nga lugar, in gintapo ini han suspek ngan gintutukan hin pusil ngan gin-aro an cellphone ngan wallet.
Mahitungod han kahadlok han biktima, in iya nala ginhatag ini ha suspek nga dayon naman nga kumaligiw. Dayon naman nga nakapangaro hin bulig an biktima ha mga kapulisan nga insakto nagpapatrolya ha mao nga lugar.
Nagbuhat hin hot-pursuit operation an mga kapulisan ngan dayon naman nga nadakop an suspek mahuman na gihapon nga maberipika han biktima nga amo an nanhold-up ha iya.
Ha pagkayana in nakapasklak na ha karsel an suspek kun diin papasakahan naman ini hin mga kaangayan nga kaso.
