TACLOBAN CITY – Ginpahayag ni Ms. Myla Garcia, STD/HIV AIDS Coordinator, nga padayon an paghitaas han kaso han Human Immunodeficiency Virus o (HIV) ha siyudad.
Sumala pa hine, an HIV in usa nga klase hin virus nga ginruruba an natural nga depensa han lawas o an immune system.
Mahitungod hini in nagiging vulnerable an panlawas ha magkaduro-dilain nga sakit o opportunistic infections sugad hiton pulmonya, diarrhea, ngan iba pa.
Ginpahimatngon gihapon hini an mga sintomas han HIV, kun diin dire diretso nasasabtan han usa nga tawo nga hiya in infected, mahitungod han komon nga sakit nga gin aabat la sugad han hiranat, ubo, sip-on, ngan iba pa nga mga sintomas nga posible huna-hunaon nga durot la hiton paiba-iba nga panahon.
Dugang pa ni Garcia nga napapasa an HIV kun an usa nga tawo in nakikipag-hilawas nga waray proteksyon, blood transfusion, ngan mother to child.
Gintagan-duon gihapon ni Garcia an importansiya han edukasyon ngan sakto nga impormasyon, labi na ha mga kabataan, agud malikayan an padayon nga pagsarang han sakit nga HIV.
Dugang pa, napapanahon na hiton paghahatag hin sakto nga hibaro ngan sakto nga giya, dire la ha mga kabataan kundi pati na gihapon ha mga kag-anak, maestra, ngan komunidad.
Kasumpay hine in gin-aaghat iton mga Taclobanons nga magpa-HIV Test ha City Health Office. (via Bombo Shiela Encio)
