NATIONAL NEWS– Ginkarawat ni anay Supreme Court Senior Associate Justice Antonio Carpio an ayat ni Sen. Rodante Marcoleta para ha usa nga pampubliko nga debate kasumpay ha West Philippine Sea.
An ira magigin pukos in kun mayda legal an West Philippine Sea ngan kun kalakip dinhe an mga maritime features han Kalayaan Island Group.
Nagtikang an kontrobersya mahuman nga igpahayag ni Marcoleta nga pwede na igsurender han Pilipinas an pira nga parte han KIG matungod nga dire ine sakop han Exclusive Economic Zone han nasud.
Butang nga ginbalabgan han Philippine Coast Guard spokesperson Commodore Jay Tarriela, nga nag-imbita pa kan Marcoleta nga umupod ha Maritime Domain Awareness flight agud nga makit-an iton aktwal nga sitwasyon.
Labot kan Carpio, ginpahayag ni Marcoleta nga karuyag gihapon niya makipagdebate kan Tarriela ngan kayn Prof. Jay Batongbacal han UP Institute for Maritime Affairs and Law of the Sea.
Mababaruan nga hi Carpio in kilala nga gindedepensaran an katungod han Pilipinas ha WPS labi na han mahuman an 2016 arbitral ruling nga nagpapawaray kapas ha nine-dash line claim han China.
Hingyap han pira nga observers nga an debate in maghahatag hin klaro ha publiko kasupay ha legal nga basaran han WPS ngan an importansya nga pagpapabilin han soberanya han Pilipinas ha mga ginpapag-agawan nga teritoryo.
