TACLOBAN CITY – Nagtutuo hi Matag-ob, Leyte Mayor Bernie Tacoy nga an Himorasak Festival iton usa ha magpaparibhong hiton turismo ngan agrikultura ha ira bungto.
Una hini, dida han nakalabay nga Setyembre 24 , nagin malinampuson an gindumara nga culmination program han 2nd Himorasak Festival 2023 kon diin walo nga mga partisipante tikang ha mga clustered barangay iton nagpaisan-isan ha street dance competition, festival costume competition ngan Himorasak dance interpretation.
Gamit an durudilain nga indigenous mga costumes ngan props ngan ha saliw han Himorasak festival music, ginpakita ngan ginsayaw han mga partisipante an ira kalugaringon nga interpretasyon han Himorasak nga karuyag sidngon, masagana nga ani.
Grand champion ha paisan isan an cluster 8 nga ginbubug-os han barangay Cambadbad, Malazarte ngan Sta. Rosa kon diin nakakarawat hira hin Php50,000 pesos.
Waray liwat partisipante nga umuli nga luhaan tungod labot la han mga consolation prizes mayda gihapon hira nakarawat nga kadugangan nga Php5,000 pesos.
Sumala kan Mayor Bernie Tacoy nagpapasalamat hiya nga pinaagi hini nga selebrasyon hinay hinay nga nakikilala ngan gindadayo an Matag-ob han mga turista tikang ha mga kahirani nga bungto.
Usa gihapon daw ini nga pamaagi kumo pagkilala ha kontribusyon han mga parag uma nga naghahatag hin pagkaon ha lamesa hiton mga Matag-obanon.
Padayon liwat nga namimiling hin pamaagi an lokal nga pangobyernuhan han Matag-ob, Leyte nga mabuligan an mga parag uma nga humitaas an ira gin-aani nga humay sugad nala hiton pagpakilala hin gahi nga mas durudamo an ani, paghatag hin mga abono ngan teknikal nga ayuda.
“We have good harvest this year tungod kay walay nahitabo nga mga baha. Nagpasalamat ta sa atung mahal nga patron. On our part we will always find ways sa pagtabang sa mga farmers sa Matag-ob arun sumaka ang ilahang ani ”, pahayag ni Tacoy.
Samtang, padayon liwat nga nakikipagsumpayan an lokal nga pamunuan han Matag-ob Leyte ha Department of Tourism para haira ginduduso nga mga tourism initiatives.
