CATBALOGAN CITY – Ginguba an usa nga haros 30-anyos na nga La Pieta Statue, usa nga memorial para ha mga nabiktima han Asia’s Titanic nga Doña Paz nga nakatindog ha Catbalogan City.
Sumala kan Samar State Univerity-Main Campus Museum and Archives ngan History Professor, Jhonil Bajado, an Pieta Park in ginpapahamtang kumo usa nga shrine—pagdumdom ha mga nabiktima han Doña Paz tragedy.
Iginkasina han mga Catbaloganon an nasabi nga panhitabo, kun diin nautod an ulo han statwa—ngan waray daw ine respito ha nasabi nga parke.
Nahibaruan naman nga mayda pagtitindog nga fast food establishment ha nasabi nga lugar rason han pag-gubaa han nasabi nga parke.
Subay naman ha gin pagawas nga pahayag han City Government han Catbalogan, nagpalusad hira hin Notice of Violation, dated April 3, 2025 nga nagmamando ha pagpa-undang han pagtindog han nasabi nga establisyemento mahitungod nga dire otorisado an pan-guba ngan development activities han nasabi nga parke, pero ha kaluyo hine nagpadayon la daw gihapon an demolisyon.
Samtang, nangaro naman hin pasaylo ha publiko an management han pagtutukuron nga kaunan ngan nagpatapod nga aaydon an naguba nga statwa.
An nasabi nga parke in gin inagurar ngan gin abrihan ha publiko dida han Agosto 22, 1995, haros 30 katuig na ngada yana.
Dugang pa hine, an naguba nga statwa in nakuha pa tikang pa ha Italya kun diin alagid-agid ine han La Pieta nga gin-ukit ni Michaelangelo ha Europa.
