ODD – Usa nga dako nga elepante an nagdurot hin kasamok ha usa nga grocery store ha Thailand han nakalabay nga Lunes han tigda la ini sumulod tikang ha harani nga national park para kumaon hin mga pagkaon ha sakob han tindahan.
Ha usa nga viral video, makikit-an an elepante nga hi “Plai Biang Lek” nga umundang anay ha atubangan han tindahan ha Khao Yai National Park.
Kalmado nga kumaon hi Plai hin mga snacks tikang ha counter ha kaluyo nga ginpapa-iwas hiya ngan ginpapauli na han mga katawhan ha parke.
Kahuman magsinam-samon, gumawas an elepante dara an usa nga bag hin mga pagkaon gamit an iya dako nga trunk.
Dire naman sugad kadako an nagin danyos han pagsulod han elepante ha nasabi nga convenience store.
Kasumpay hini, iginpahayag han tag-iya han tindahan nga hi Kamploy nga kumaon an elepante hin siyam ka-pakete hin sweet rice crackers, usa nga sandwich, ngan pira nga ginpamara nga saging.
Sumala naman kan Danai Shookkanthachat, usa nga volunteer ha parke, kilala hi Plai nga nasasakob la ha mga balay agud mangaro hin pagkaon.
