TACLOBAN CITY – Padayon an pag-uswag han Gulayan Sa Paaralan ha siyudad han Tacloban kun diin, aada na ha 64 nga eskwelahan an nagpartisipar hini nga programa.
An mao nga programa in kolaborasyon han magkadurudilain nga ahensya nga nagduduso ha pagribhong han agrikultura labi na ha mga siyudad kun diin, limitado la an lugar nga pagtatamnan kumo kaparti na gihapon ha National Urban ngan Peri-Urban Agriculture Program.
Sumala kan Tacloban City Agriculture Head, Romelo Anade nga an panuyuan hini nga programa in agud masulosyonan an ayat ha sector han agrikultura. Sugad hiton nagtitikaguti nga produksyon ha agricultural products mahitungod hiton climate change ngan sugad man an nagtitikalagas nga populasyon han mga parag-uma.
Panuyuan gihapon hini in agud aghaton ngan ipakilala an pagtatanum ngan pag-uuma ha mga kabataan ngan malikyan gihapon an kagutuman ha mga estudyante.
Kun manunumduman nga nagtikang an mao nga programa ha tuig 2019 kaparte han ginpalusad nga memorandum han Department of Education kun diin, gin-implementar ini ha mga eskwelahan ha bug-os nga nasud.
