TACLOBAN CITY – Gin angkun han rebelde nga grupo nga Arnulfo Ortiz Command an pag aambush han an anay mayor han San Jose de buan, Western Samar.
Gintawag naman nga rapist ngan counter revolutionary han mao nga grupo an gin ambush nga alkalde.
Sumala han ira ginpagawas nga pamahayag, nga gintapo han maabot 4 nga New People’s Army (NPA) an kampo ni Mayor ananias Rebato mahuman ini nga umatendir han usa nga piyesta.
Maiha na daw nga ginsumunan han People’s court an mao nga alkalde agud nga papagbatunon an kaso nga guin babatak ala kontra ha iya.
Pero imbes daw nga batunon ini lugod nagrequest ini hin pwersa han kasundaluhan ngan nagdumara hin military operation ngan nanharrass ha mga nagrereklamo.
Pira ha mga ginbabatak nga reklamo kan Mayor Rebato in amo an:
31 counts han kaso nga rape ngan multiple sexual harrasment ha mga kababayin-an nga daw nagin scholar hini nga kun diin kaurog mga menor de edad.
Gingamit daw ni Mayor Rebato an iya otoridad komo alkalde nga kun diin ginpa scholar ini nga mga kabataan kabalyo ha iya panmomolestya.
Labot pa hini, gin aakusaran liwat an mao nga alkalde nga dabi han counter revolutionary activities nga nagmimintinar han platoon goons nga mayda panuyuan nga magharass ha gintutuuhan nga NPA.
Mastermind liwat ini han pagkawara han mga parag uma ha Barangay San Nicolas nga gintututuhan niya nga NPA syphatizer.
Diri pa daw dinhi lakip an pagiging sponsor han brutal nga militarisasyon, korapsyon han public funds, pagbursa hin multi million nga pondo ngan padayun nga pagkontra han revolutionary movement.
Padayun naman daw an pangaro hin hustisya han komunista nga grupo para han tanan tanan nga nabiktima han mao nga alkalde.
Ginkondina naman han Arnulfo Ortiz command an pag-abduct han batan-on nira nga miyembro ngan panawagan hini nga palayaun na ini.
Mababaruan nga an mao liwat nga grupo an nagpatay han dati nga alkalde han daram nga hi Mayor Benito Astorga dida han tuig 2007.
