NATIONAL – Dumire an gobyerno han Australia nga magin host country kan anay Presidente Rodrigo Duterte para ha ira interim release.
Manunumduman nga syahan nga ginmalatumat ni Vice President Sara Duterte ha interview han media ha Melbourne dida han bumisita an Bise Presidente nga nakada ha listahan han mga nasud an Australia nga ginkokonsidera han iya tatay nga magin host country para ha iya temporaryo nga paggawas.
Sumala ha Bise Presidente, nagpatapod an Melbourne nga mabulig o kakarawton hine an anay presidente pero waray pa hine magpagawas hin kadugangan nga detalye.
Maaram gihapon an gobyerno han Australia ha petisyon han anay presidente para ha interim release tikang ha detention center han ICC ha The Hague, Netherlands. Pero waray daw ine tumugot nga mag-host ha anay presidente ngan waray gihapon ine ig konsidera.
Nakikita han Australia an aplikasyon han anay presidente para ha provisional release kumo usa nga istoryahon nga kinahanglan igkonsidera han ICC ha ilarom han Rome Statute, an founding treaty han korte kun diin member state gihapon an Australia.
Syahan hine, ha petisyon nga ginsalawad para ha interim release han anay Presidente dida han Hunyo 12, ginkumpirma han defense team hine nga nagpahayag hin kaandaman an usa nga nasud para karawton an anay presidente ha panahon han iya interim release ngan igpatuman an mga kondisyon para ha iya paggawas. Pero redacted o waray ig upod an ngaran han nasud ha dokumento.
