Usa nga gintutuohan nga shabu an narekupo han mga otoridad tikang ha usa nga menor de edad nga estudyante ha gindumara nga routine security inspection ha usa nga eskuylahan ha Barangay San Miguel, Palompon, Leyte dida han mga nakalabay nga adlaw.
Sumala kan Palompon Municipal Police Station Officer-in-Charge, PMAJ. Rushty Alvarado nga nagtikang an insidente mahuman nga mapansin han school security guard an usa nga high school student nga may dara nga tulo nga bag samtang naagi ha security inspection.
Dugang hini nga nagdumara hin mahugot nga inspeksyon an security guard mahuman nga tumunog an metal detector ngan na-iscan an usa nga bag nga dara han estudyante. Napansin han security an usa nga “suspicious” nga pouch nga kun diin, dayon niya gindara an estudyante ha opisina han school principal, nga umaro naman hin bulig ha mga kapulisan kasumpay hini nga panhitabo.
Dayon naman nga rumesponde an mga otoridad kun diin, ha gindumara nira nga pagdokumento ngan imbestigasyon, nakumpiskar nira an usa nga pouch tikang ha bag han menor de edad nga mayda sulod nga gintutuohan nga shabu nga natimbang naman hin 0.70 ka-gramo nga nagkakantidad naman hin P4,760.
Mahugot naman nga ginpanhimuwa han estudyante nga ginkikilala kan alyas “JVO” nga kun diin, mahugot nga gindig-on hini waray hiya sarabutan nga mayda ngay-an niya gindadara-dara nga ilegal nga droga.
Ha pagkayana, in ginpailarum na an menor de edad ha insakto nga proseso kumo Child in Conflict with the Law o kun CICL ngan ginturn-over ha Municipal Social Welfae and Development Office para ha kaangyaan nga dokumentasyon, intervention, ngan disposasyon kasunod naman ini han balaud may paghisumpay ha pagkapot ha mga menor de edad.
