TACLOBAN CITY – Gin-aprubahan na han Tacloban City government an ginsumiter nga proposal han Brgy. 39 Siren syudad han Tacloban bahin han contingency plan ngan guidelines nga igpapatuman para han mga deboto nga masakob ngan masaka ha Calvary hill kasumpay han nakatalaan nga pagsalin-urog han Semana Santa.
Sumala kan Ricardo Ogardo, kapitan han Brgy. 39 Siren Tacloban, tumugot na an syudad para han ira rekomendasyon ngan proposed guidelines para ha masunod nga semana.
Pira ha mao nga mga aludayday amo an mahugot nga pagpatuman han pagsul-ot han face mask, face shield ngan pag-obserbar han physical distancing.
Labot pa han body temperature check in magkakaada gihapon hin inspeksyon ha mga dara nga gamit han mga masaka ha bukid agud nga masiguro nga waray an mga ini dara nga weapons o armas ngan ano man nga higamit nga pwede nga makagdurot hin hulga ha seguridad.
Kaparte pa gihapon ha mao nga guidelines nga 15 katawo an gintutugutan ha kada station of the cross agud nga masiguro nga dire maghuhuruot.
10 minutos la gihapon an gintutugot nga kaiha han pagpapabilin han mga deboto ha kada istasyon kun diin mayda nakatudlok nga mga station managers nga magbabantay.
Nananawagan naman ini ha publiko nga nagpaplano nga sumaka ha Calvary Hill nga magsunod ha mao nga mga aludayday ngan health protocols agud nga magkaada hin mahinungdanon ngan mahimyang nga pagsalin-urog han Semana Santa yana nga tuig ha kaluyo han nagpapadayon nga pandemya.
