TACLOBAN CITY– Ginkompirma han Department of Health Eastern Visayas DOH-8, nga usa nga 24-anyos nga lalaki an gin-oobserbaran ha pagkayana nga gin-aalegar nag positibo ha ginkakabarak-an nga mpox.
Sumala kan nga Dr. Ludina Insigne, Emerging and Re- Emerging Infectious Disease DOH Vlll, nga subay ha ira gindumara nga eksaminasyon, nga an gin-aalegar nga naduktan hine nga mpox, in naka-abat hin mga sintomas sugad hiton; balik-balik nga haranat, ngan mga pantal-pantal ha panit, sugadman pagkakamayda hin rashes ha nawong ngan samad ha may wa-it, naka-abat gihapon ine hin nose bleeding, ngan iba pa nga mga sintomas nga dara hiton mpox.
An nasabi nga pasyente, in residente han Northern Samar, ngan waray travel history.
Ginmalatumat ni Insigne, una hine an nasabi nga pasyente in nagpailarom ha dengue examination, matungod nga kahuna han mga ine nga posible nga positibo ine ha dengue matungod nga hitaas mangud yana an kaso han nasabi nga sakit.
Dayon naman nga nagdumara hin panginano ngan inspeksyon an nasabi nga buhatan han mga nagin close contact han pasyente kun diin umabot ine ha 12 nga ihap, ngan ha pagkayana, in naka- isolate na an mga ine.
Gin-abisuhan naman hine an publiko, nga dire mabaraka ha nasabi nga sakit, lugod in dayon nga magpa konsulta ha pinaka-harani nga health center ngan ospital, pananglitan nga maka-abat hin mga sintomas han mpox.
Ha pagkayana, waray pa bakuna kontra mpox an Pilipinas, sanglit nga ginpapag-ikmat la anay publiko ha mao nga virus, ngan likayan nga nga makig-halubilo ha mga matatawo nga lugar, mas maupay gihapon nga magsul-ot hin face mask ngan kun dire naman importante an larakton in magpabilin ha ira tagsa-tagsa nga panimalay.
