NATIONAL – Natugot an mga lider han Quad Committee han Kamara de Representantes nga batunon an gastos ha pamasahe ngan akomodasyon ni anay Presidente Rodrigo Duterte basta umatender la ine ha pagdungog kasumpay ha kaso han extrajudicial killing ha iya war on drugs campaign.
Andam daw nga mag-aragmot hira Quad Comm overall chair Robert Ace Barbers, ngan mga co-chairman nga hira Dan Fernandez, Bienvenido “Benny” Abante Jr., ngan Joseph Stephen “Caraps” Paduano, vice chair Romeo Acop, Senior Deputy Speaker Aurelio “Dong” Gonzales Jr., ngan Deputy Speaker David “Jay-jay” Suarez agud dire magin balaong an gastos ha pag-atender ni Duterte ha nasabi nga hearing.
Dida han nakalabay nga pahayag in ginmalatumat ni Duterte nga waray na ine pan gastos rason nga waray ine maka-atender han pagdungog dida han nakalabay nga adlaw.
Ginpahayag naman ni Joseph Stephen “Caraps” Paduano, Chairman han Committee on Public Accounts, nga posible nga intensyunal an kadire pag-atender ni Duterte.
Pero ha sumunod nga surat ni Atty. Martin Delgra III, abogado ni Duterte, nagdesisyon daw an anay Presidente nga dire nala umatender mahitungod nga dire na daw ine kinahanglan mahuman hiya nga umatubang ha pagdungog han Senado ngan gagamiton la daw ine han Kamara agud makasuha hiya.
Sumala naman ha mga lider han Quad Comm, seryoso hira nga mapakianhan hi Duterte agud mahibaruan an kamatuuran.
