NATIONAL NEWS– Ginbalhin na ha Philippine General Hospital hi anay Negros Oriental congressman Arnolfo Teves Jr.
Pasado alas 12 hiton ka-agahon yana nga adlaw han dad-on ine ha PGH tikang ha Bureau of Jail Management and Penology (BJMP) matungod ha duro nga pagsinakit hiton tiyan.
Nagin mahugot naman an ginpatuman nga seguridad ha palibot hiton PGH.
Una na nga ginpahayag hiton abogado hine nga hi Atty. Ferdinand Topacio nga ginrekomenda hiton doctor han anay manbaralaod nga ine in kinahanglan na igpailarom ha operasyon.
Ginhangyo gihapon han mga ine nga dad-on hiya ha pribado nga ospital, pero ginbaribaran ine hiton mga otoridad.
Mababaruan, naatubang ha patong-patong nga kaso hi Teves matungod nga hiya an gintutudlok nga mastermind ha pagpatay kan Negros Oriental Governor Roel Degamo han tuig 2023.
