TACLOBAN CITY – Magkaada na hin bag-o nga pasilidad an Eastern Samar State University (ESSU) – Arteche campus nga magagamit diri la hiton mga estudyante kundi pati na hiton mga magturutdo.
Dida han nakalabay nga Hunyo 8, 2024 gindumara an usa groundbreaking ceremony han pagtitindugon nga academic building ngan multipurpose building han ESSU- Arteche campus.
Ini in gintambungan ni House Minority Leader ngan 4Ps Partylist Representative Marcelino Libanan, ESSU President Dr. Andres Pagatpatan, ESSU Arteche Administrator Engr. Arnaldo Villalon, Board Member Byron Suyot nga nanaglawas kan Gov. Ben Evardone, Department of Public Works and Highways Eastern Samar OIC Assistant District Engineer Engr. Chito Nelson Eusores, Arteche Mayor Roland Boie Evardone, Vice Mayor Rolando Evardone, ABC President Eloise Evardone, mga kag’anak ngan estudyante.
An pagtitindugon nga duha ka andana an academic building in ginpondohan PHP21 million kon diin kaparte han proyekto iton paghimo hin walo nga mga classroom nga makakag- accommodate hin 400 nga mga estudyante.
An duha kaandana nga multipurpose building liwat in ginpondohan hin PHP5 million kon diin kaupod hini iton pag ayad hin student lounge ha ground floor.
An duha nga proyekto in ginpondohan pinaagi han General Appropriations Act of 2024 ngan target nga mahuman ha sakub hin upat ka bulan.
Sumala kan House Minority Leader ngan 4Ps Partylist Representative Marcelino Libanan nga padayon niya susuportahan iton mga proyekto nga magpapaupay hiton kalidad ha edukasyon labi na para ha mga Estehanon.
” Iton napaupay hiton usa nga lugar iton edukasyon. Tungod hini nga aton pagmartsa agud mapaupay iton edukasyon, nakakasiguro ako nga makakaabante kita hin maupay ngan gidadamu-i pa i iton aton bubuhaton para igdedevelop ini nga aton campus.” mensahe ni Libanan ha atubangan han mga kag-anak ngan mga estudyante dida han groundbreaking ceremony.
Ginpatapud gihapon hini nga hul-os nga susuportahan an balaudnon ha Kongreso nga magco-convert ha ESSU – Arteche Extension campus ha pagigin regular nga campus nga panuyo nga magkaada hin kalugaringon pondo an mao nga eskwelahan.
Samtang, sumala naman kan ESSU Arteche Administrator Villalon in padayun nga naghihitaas an ihap han ira mga enrollees sanglit nalilipay hira nga magkakaada hin kadugangan nga classrooms an mga estudyante.
Tikang ha sobra 180 nga mga enrollee naghitaas ini ngadto ha sobra 800 han nakalabay nga tuig ngan gin bananabana nira nga mahitaas an ira enrollment ngadto ha sobra mil nga estudyante yana nga school year.
