BALANGKAYAN, EASTERN SAMAR – Nagin manilampuson an kabug-usan nga pagdumara han Eastern Samar Provincial Athletic Association Meet 2026 ha Balangkayan, Eastern Samar dida han nakalabay nga semana.
Sumala kan Department of Education Eastern Samar Division Information Officer, Abner Aclao, ha kaluyo han duha kaadlaw nga uuran nga ira naekspersyahan in nagin talwas ngan manilampuson an kabug-usan han aktibidad.
Talwas mahitungod nga waray bisan ano nga maraot nga panhitabo, ngan malinampuson mahitungod nga nakuha nira an mga atleta nga sulod ha standards han gindumara nga selection process, rason han pagkakamay-ada han ira ginbubuhat nga concentration training.
Nanguna naman ha kahuhuman la nga ESPAAM 2026 an delegasyon han Yunit II tikang nasabi nga dibisyon.
Samtang, maabot naman ha 700 an ihap kabug-usan nga atleta an nakatalaan igpadara han Eastern Samar Division ha Baybay City para han Eastern Visayas Regional Athletic Association Meet 2026 yana nga Marso 1-7, 2026.
Dugang pa ni Aclao, waray angay igkabaraka an mga kag-anak han mga atleta mahitungod nga suportado gihapon han probinsyal nga gobyerno an mga atleta tikang ha medisina, pagkaon, uniporme, ngan transportasyon.
Iginparayaw gihapon hini, nga ha yana in ada ha 90% an ira pangandaman para ha pagkab-ot han mga medalya ha paisan-isan, samtang an 10% naman in para ha nasasalin nga adlaw nga paghag-id ngan pag-pamilyar han mga playing venues ha Baybay City.
