TACLOBAN CITY – Samaran an usa nga empleyado han City Environment and Natural Resources Office (CENRO) han Baybay City, mahuman ini nga pagpusilon ha tay-aw nga lugar hiton Brgy. Old Taligi Abuyog, Leyte.
Ginkilala an biktima kan Romeo Llorada Maiko, 63 anyos an pangidaron, forest technician ngan residente han Brgy. Picas, Javier Leyte.
Sumala kan PMaj. Luis B. Hatton, Acting Chief of Police han Abuyog Municipal Police Station, tiuli na sakay han iya motorsiklo an biktima mahuman nga magmonitor ha mga illegal loggers ha Brgy. Mahayahay, an pinaka-interior nga barangay han Abuyog, Leyte, han pagpamumusilon ini han waray pa kakikilal-e nga suspek.
Nag-angkon hin duha nga inig-an hin bala an biktima pero nahimo pa hini nga makapagmaneho han iya motor agud nga masalbar an iya kalugaringon.
Waray naman nakakakita nga testigo han insidente tungod nga ha tay-aw nga lugar han mao nga bungto ini nahitabo.
Ha pagkayana in padayon nga nagpapaupay an biktima ha usa nga ospital ha Tacloban.
Padayon gihapon an ginbubuhat nga imbestigasyon han mga kapulisan bahin han mao nga panhitabo.
panhitabo.
