TACLOBAN CITY – Supendido la anay an mga educational field trips han pira nga iskuylahan ha rehiyon mahitungod han direkta nga ginpalusad ni Presidente Ferdinand Marcos Jr. kasumpay han pag-iban o pag-tipid ha konsumo han enerhiya ngan lana.
Ini in mahuman nga mayda pira nga kag-anak han mga istudyante ha Eastern Samar State University Guiuan Campus an naghangyo nga dire himuon nga mandatoryo an mga field trips.
Sumala kan Commission on Higher Education Regional Office VIII Regional Director, Dr. Maximo C. Aljibe, dayun niya nga gintawagan an School Administrator han ESSU-Guiuan pakakarawat niya han reklamo agud beripikahon ini.
Sumala naman han Administrator, mayda na ginpalusad nga memorandum tikang ha Office of the University President nga nagmamando ha ira nga suspendihon la anay an mga field trips, sanglit naaksyunan dayun an reklamo.
Nakatalaan unta nga pagdumaraon an field trips han mga istudyante ha Cebu ngan Manila, pero mahitungod han presente nga sitwasyon ha nasud partikular na an kakulangan ha suplay han lana, in ginsuspend la anay ini.
Samtang, labot la han ESSU-Guiuan Campus in pira pa gihapon nga mga Higher Education Institutions (HEIs) ha rehiyon an nagdeklara na hin suspensyon ha ira mga nakatalaan nga educational tours.
Ha lain nga bahin, gawas han presente nga sitwasyon han nasud ngan kamanduhan nga ginpalusad han Presidente, ginmalumat ni RD Aljibe nga an mga educational tours o field trips in kaparte han curriculum nga kinahanglan pag-agian han usa nga istudyante.
Dugang pa hini, ha trend yana in mas maupay kun dako nga porsyento han pag-aram han mga istudyante in ha on-the-job training o ha aktwal na mismo nga sitwasyon kumpara ha theoritical nga aspeto han kurso o programa mahitungod nga ini an gin-aaro.
Pero mahitungod han presente nga sitwasyon han nasud ngan ginsusunod pa an luma nga curriculum in mas gutiay la gihapon an oras nga igin aalutaga ha mga on-the-job trainings o mga education tours.
Mag-iiha naman an suspensyon han mga educational tours hin usa katuig o kadungan han pagbulkas han State of National Emergency ha nasud.
