TACLOBAN CITY – Ginlunsar han Department of Health Regional Office 8 an pinakasyahan nga council ha Sinirangan Bisayas nga Eastern Visayas Local AIDS Council agud nga mapugngan ngan mapuypoy an padayon nga paghinitaas hin kaso han mga nagpopositibo ha HIV/AIDS diri la dinhi ha rehiyon kundi pati na gihapon ha bug-os nga nasud.
Sumala kan Dr. Ma Teresa Caidic, MPH, OIC-Chief han Local Health Support Division han DOH-8, nga hingyap ngan panuyo nira nga ini nga bago nga council in magpabilin, mag iha ngan magin relevant ha mga katawhan.
Kaapi han mao nga council in an magkadurudilain nga mga Government Agencies ngan mga Lokal nga Panggobyernuhan sugad han Department of Labor and Employment, Commission on Population and Development, Philippine Health Insurance Corporation, Philippine Information Agency, Philippine National Police, Bureau of Jail Management and Penology, Leyte Provincial Health Office, ngan an Tacloban City Health Office.
An HIV o kun Human Immunodeficiency Virus in usa nga klase hin virus nga target niya an immune system an usa nga indibidwal nga kun diin, mayda ini magkadurudilain nga mga stages sugad han Acute HIV Infection, Chronic HIV Infection ngan an Acquired Immuno deficiency Syndrome o kun AIDS.
Ha pagkayana in waray pa ini nadedevelop nga epektibo nga tambal, salit kun an usa nga indibidwal in makakuha han HIV, in bitbit na itun nira ha ira lawas, pero pinaagi hin sakto nga medical care, puydi ini makontrol nga magreresulta liwat nga hira in mabuhi hin normal.
