TACLOBAN CITY – Arestado an duha nga SK Chairman mahuman an gin-aalegar nga panlugos han mga ini ha usa nga 15-anyos nga babaye ha Naval, Biliran.
Mababaruan nga nag-eedad 25 ngan 23 anyos an mga suspek nga pareho an mga ini SK Chairman ha duha nga barangay ha mao la nga lugar.
Sumala kan PCapt. Ryan Delima, Chief of Police han Naval Municipal Police Station, nakadto ha usa nga fiesta celebration an biktima ngan mga suspek kun diin nagkatarangka pa ini tubtob han kaagahon han Hunyo 8.
Basar ha inisyal nga imbestigasyon, gin-aghat han mga suspek an biktima nga pumahuway ha usa nga hotel matungod nga karuyag na kumaturog han usa ha mga suspek.
Na-aghat naman an biktima nga umupod ha mao nga hotel kun diin didto natabo an mao nga daw panlugos ha iya han mga suspek.
Ha nasabi la nga adlaw in personal nga dumangop ha mga kapulisan an biktima kun diin ginsumat hini an mao nga insidente.
Dayon naman nga rumesponde an mga kapulisan hinungdan han pagka-aresto han duha nga suspek.
Ha pagkayana in nag-aatubang ha kaangayan nga kaso an duha nga SK Chairman samtang naghatag na gihapon assistance an local DSWD para ha pag-asistir ha biktima.
