ORMOC CITY – Dakop an duha nga lalaki mahuman nga magprubar an mga ini nga manholdap ha usa nga pawnshop ha Ormoc City dida han nakalabay nga adlaw.
Ginkilala an mga holdaper kanda alyas “Johnny”, 22-anyos an pangidaron, taga Argao, Cebu City ngan kan alyas “Vin”, 37-anyos, taga Pagadian City, Zamboanga del Sur kun diin, nakuha han mga kapulisan han Ormoc kan alyas Vin nga nagpanggap kumo usa nga pulis, an calibre .45 nga pusil nga mayda 8 nga live ammunitions, ngan usa nga spare magazine nga mayda sulod nga 7 ka-bala ngan Yamaha motorcycle nga gingamit kumo getaway vehicle.
Sumala kan Ormoc City Police Station 1, Officer-In-Charge, Police Captain Flora Mae Molina, nga nakakarawat hira hin alarm nga konektado ha ira istasyon tikang ha pawnshop nga kun diin, dayon nga igin pandeploy an mga nagpaka-standby nga kapulisan han siyudad.
Basar han ira ginbuhat nga panginano, ginpindot an alarm han clerk han mao nga pawnshop mahuman nga makaabat ini hin kabaraka ha ginpapakita nga suspicious nga giwaos han duha nga suspek ngan an pagprubar han mga ini nga manhold-up.
Nadakop naman han mga kapulisan an duha nga holdaper ha karsada han Lopez Jaena ngan Bonifacio Street ha Ormoc City mahuman nga makorner matungod han paglanat haira han mga traffic enforcers.
Samtang, labot la ha kaso nga attempted roberry nga ginkakaatubang han duha, in papasakahan gihapon hin llegal Possession of Firearms ngan Usurpation of Authority hi alyas “Vin” matungod han pagpanggap hini kumo alagad han balaud.
Ha pagkayana in padayon iton ginbubuhat nga imbestigasyon han mga kapulisan an bug-os nga detalye han pagprubar panholdap ha Ormoc han mga suspek.
