TACLOBAN CITY – Ginpahayag han Department of Trade and Industry (DTI) Regional Office 8 nga padayon nga ginpapag-istudyuhan han ira ahensya kun ano angay nga pitad bahin han posible nga paghitaas han presyo han mga primero nga papliton.
Ini in ha butnga han panawagan han pira nga mga manufacturers nga magkaada hin price increase han ira mga produkto.
Sumala kan Aivi Borbon Ancheta, information officer han DTI Regional Office 8, mayda mga manufacturers ngan negosyante nga naghahangyo na hin paghitaas han presyo han ira mga produkto tungod han pag umento han presyo liwat han mga raw materials nga ira gingagamit ngan cost of transportation.
Ha pagkayana in ginpapag-adman pa ini han DTI ngan ginkokonsidera an sitwasyon han mga manufacturers sugadman an mga konsumidor nga dire liwat madehado ingkaso nga magkaada hin price increase.
Nahibaruan nga primero nga nakakaapekto ha pagkayana ha paghitaas han presyo han mga primero nga papliton ngan oil price hikes in matungod ha nagpapadayon nga krisis ha Ukraine ngan Russia.
