TACLOBAN CITY – Patay an usa nga driver hiton minibus mahuman ini nga pag bun-on han usa naman nga driver hiton multicab ha Diit, Tacloban dida han nakalabay nga Sabado, Hunyo 29, 2024.
Ginkilala an biktima kan alyas “Jak”, 31 anyos an pangidaron, usa nga minibus driver ngan residente han Brgy.74 Nulatula, Tacloban City. Samtang ginkilala naman an suspek kan alyas “Jovi”, 60-anyos, multicab driver ngan residente naman han Brgy. 37-A, Palanog, Tacloban City.
Basar ha imbestigasyon han mga otoridad, dida han adlaw han insidente in humaw-as an biktima ha iya minibus nga gindradrayban agud magpasakay hin mga pasaheros samtang nakikig-istorya ha igkasi driver hini kun diin, nakit-an ini han suspek ngan dayon hini nga gin kalitan pagbuno gamit hiton pisaw ngan naigo hini an dughan hiton biktima, waray naman ini kapug-ngi mahitungod ha kadagmit hiton panhitabo.
Nasabtan nga an hinungdan han nasabi nga insidente in daw gin-agaw han biktima an mga pasaheros han suspek dida han mga nakalabay nga adlaw sano an panhitabo, ngan ginyaknan han suspek an mao nga biktima nga pag-ikmat tungod nga “mabulos” ini.
Samtang, waray makatalwas an biktima kahuman nga igdalagan ini ha ospital, kun diin gindeklara ini nga dead-on-arrival, dagmit naman nga umiskapo an suspek mahuman an nasabi nga insidente.
Ha pagkayana in padayon pa ine nga ginhahalpat han mga otoridad, ngan gin-aandam na gihapon iton kaso nga igpapasaka ala kontra ha mao nga suspetsado.
