NATIONAL – Iginbuyagyag ni Department of Justice (DOJ) Secretary Jesus Crispin Remulla nga mayda na hira kapot nga panibag-o nga testigo kasumpay ha kaso han pagkawara han mga sabungero.
Sumala mismo ha nasabi nga sekretarya, labot ha iba pa nga mga testigo sugad kan alyas Totoy, may-ada hira bag-o nga testigo nga makakabulig ha ira gindudumara nga imbestigasyon.
Pero waray anay hine ngarani an pangilal-an han bag-o nga testigo ngan ginpahayag nga mahibabaruan nala ine han publiko ha mga masunod nga adlaw.
Dugang pa hine, dire la basta testimonya an kapot nira kundi mayda pa sigurado nga ebidensya an igpapaangbit han nasabi nga testigo.
Kun diin natuod naman hi Remulla nga mapapadig-on hine an kredibilidad han nagpakilala nga testigo nga hi alyas ‘Totoy’.
Samtang, kadungan han pagbisita ni Philippine National Police (PNP) Chief General Nicolas Torre III ha Department of Justice, ginkumpirma naman ni Secretary Remulla an pagkakatanggal ha usa nga ‘service commander’ han PNP.
Pag-eksplikar ni Secretary Remulla kun kay anu niya ine ginpatanggal ha pwesto in mahitungod han daw dire angay nga pag-gios hine ha gindudumara nga imbestigasyon ha pagkawara han mga sabungero.
Dugang pa hine, importante an pagkakamay-ada hin pagtapod labi na ha pagproseo ngan pagresolba han kaso agud maipaangbit o makag-yakan an pira ha ira pag-iimbestiga.
