TACLOBAN CITY– Ginmalatumat hiton Department of Health Regional Office Vlll, nga nagpapadayon an ira ginhihimo nga mga vaccination ha rehiyon kutob mahuman iton tuig 2025.
Sumala kan Princess Debbie Garcia, Information Officer Designate, Department of Health Regional Office Vlll, han nakalabay nga semana han Abril 24, nagkamayda hira hin launching activity ha Calbayog City, Samar kun diin ira ginsasalin-urog an World Immunization Week.
Mahagos naman an nasabi nga aktibidad kutob hiton Abril 30, yana nga tuig.
Dugang pa ni Garcia, nga dire la ine kinada summer gindudumara an World Immunization Week, matungod nga whole year round activity ine hiton ira buhatan.
Ginpaangbit pa hine, nga nagkakamayda mangud hira hin school based immunization, karuyag sidngon, mayda mga nurses nga makadto ha kada-eskwelahan agud nga makagdumara hin panbakuna ha mga estudyante.
Ha lain nga bahin, adton mga new born-babies naman in kinahanglan dad-on ha ira pinakaharani nga Rural Health Unit, para igpailarom ha immunization.
Gin-aaghat naman han mao nga opisyal, mapa-bata man o may edad in kinahanglan makatagamtam hin bakuna, agud nga makalikay ha kadelikaduhan nga durot hiton sakit.
