TACLOBAN CITY– Maabot ha 117 cases hiton Human immunodeficiency virus (HIV), an nahipatik nga ihap hiton Department of Health Eastern Visayas tikang han Enero 1 kutob han katapusan han Marso yana nga tuig.
Sumala kan Department of Health Eastern Visayas Regional Office 8, Information Officer Jelyn Lopez Malibago, ha nasabi nga ihap 39 dinhi an nahirecord han bulan hiton Marso.
Dugang pa ni Malibago, nga kaparehos han mga nahihireport han nakalabay kadam-an ha mga ine in kalalakin-an, kun diin nag-eedad ha 15-50 anyos an pangidaron.
Ginmalatumat ni Malibago nga ha sakob hiton 117 nga ihap 112 dinhi in puros kalalakin-an.
Gin-paangbit pa ni Jelyn Malibago, nga an 100% ha mga ine in sexually transmitted, karuyag sidngon naipasa an nasabi nga sakit pinaagi hiton pakig-hilawas.
Nahibaruan gihapon nga an pinaagi han pagtransmit han nasabi nga virus in an pakikig-hilawas hin kaparehos gender.
Ginbana-bana gihapon han buhatan nga an ihap han HIV cases ha rehiyon in kaparehas han nakalabay nga tuig.
Nagtutuo naman an nasabi nga opisyal, nga nahitaas an kaso han HIV cases, matungod nga damo na iton nagpapa-test han ira kalugaringon kasumpay hiton nasabi nga sakit.
Karuyag sidngon, hinay-hinay na nga nawawara an stigma ha himangrawon nga HIV.
Nanawagan naman ine ha publiko, nga dire mag-alang nga magpa konsulta ha pinakaharani nga health centers o ospital kun ikaw in nagruruwa-duha nga positibo ha nasabi nga sakit.
