Gin hangyo han Department of Migrant Workers (DMW) ha Office of the Ombudsman nga pag-adman utro an nagin desisyon hini nga igbasura an mga reklamo nga plunder, graft, ngan malversation kontra kan anay Overseas Workers Welfare Administration (OWWA) Administrator Arnell Ignacio kasumpay han kontrobersyal nga P1.4-billion property deal nga gindumara hin waray katugutan han OWWA Board of Trustees.
Kalakip ha mga ginpasa nga ebidensya han ahensya an duha nga cheke han LandBank nga nagkakantidad han kabug-usan nga P1.4 bilyon, nga gin isyu ha nagbaligya han propyedad dida han Agosto 30, 2024—12-kaadlaw ugsa an petsa han Deed of Absolute Sale.
Labot pa hini, ginhangyo gihapon han DMW ha Ombudsman nga imbestigahan an waray makit-an nga 51 condominium units nga iginlakip ha kabug-usan nga kantidad nga ginpalit han mga propyedad.
Gin papaimbestigahan gihapon an pagkakaiba han P1.2 bilyon valuation han Land Bank ngan an aktwal nga P1.4-billion purchase price han nasabi nga property.
Syahan na nga ginbasura han Ombudsman an mga reklmao nga plunder, graft, ngan malversation kontra kan Ignacio mahitungod ha kakulangan hin sakto nga ebidensya.
Sugaman, ha nasabi nga resolusyon nga mayda petsa nga Hulyo 7, ginpasakahan han Ombudsman hi Ignacio hin kaso nga usurpation of official function mahuman gumios hin mag-usaan hin waray otoridad tikang ha OWWA Board of Trustees.
