NATIONAL- Ginpahamubo na han Department of Foreign Affairs (DFA) ha alert level 2 an security alert ha nasud Iran.
Ine in kasunod na gihapon han paghuphop han sitwasyon ha nasabi nga nasud, kasumpay hiton ginpapatuman nga ceasefire o tigil-putukan ha butnga han Israel.
Subay ha ahensya, dayon nga magigin epektibo an Level 2 o Restriction Phase.
Kasumpay hine, ginsuspender la anay an deployment o pagpapadara han mga magtratrabaho nga Pilipino ngan pagbiyahe ha nasabi nga nasud matungod la gihapon ha hulga han seguridad.
Manunumduman, una na nga gin-isa han Pilipinas ha Alert Level 3, nga nagmamando hin voluntary repatriation para ha mga Pilipino han nakalabay nga bulan matungod han nakaka-alarma nga balyuay hiton missile ngan air strikes ha butnga hiton Iran ngan Israel.
