TACLOBAN CITY – Ginlalauman na han Department of Education (DEPED) Tacloban City Division nga mas mahitaas pa an ihap han ira mga enrollees yana nga maabot nga school year 2022-2023.
Ini in mahuman nga umabot ha sobra 40% han ira target an naging turnout han ira enrollees ha syahan pala nga semana han enrollment period.
Sumala kan Dr. Nilo Eder, tagapagyakan han DEPED Tacloban City Division, maabot ha 59,000 an ira mga enrollees han naglabay nga tuig pero ginlalauman nira nga mas hitaas pa hini an ira mga magiging enrollees para yana nga maabot nga school year.
Ha syahan nga semana han enrollment period in umabot na ha 24,000 an ira nakarawat nga mga enrollees para ha magkadirudilain nga grade level.
Ginlalauman gihapon han Tacloban City DEPED nga makakab-ot nira an sobra 50% turnout ha ira target yana ngan ha masunod nga mga adlaw.
