Naglunsar an Department of Education (DepEd) hin usa nga school safety drill agud ig andam an mga istudyante ngan magturutdo ha sakto nga bubuhaton ha oras nga magkamay-ada hin karahasan ha sulod han iskuylahan.
Panuyo han programa nga mapakusog an katalwasan ha mga iskuylahan ha bug-os nga nasud.
Gintikangan han DepEd an National Safe Schools Summit and Safety Drill ha Manila Science High School, kun diin sobra 1,700 nga istudyante tikang ha Grade 7 kutob Grade 12 an nakiusa.
Ha gindumara nga drill, iginpakita an magkadiru-dilain nga sitwasyon ngan an sakto nga bubuhaton han mga istudyante ngan magturutdo kun mayda armado nga tawo o active shooter nga sumulod ha iskuylahan.
Ha gindumara nga pilot drill, napansin han mga security expert nga bisan man kun nagin maupay an pagbaton han mga nakiusa, may pira la gihapon an nag-alangan ngan malaksi kapuyon.
Sanglit importante daw an pauru-urtro nga paghag-id agud magin malaksi ngan sakto an ginbubuhat han mga ini ha oras han kadelikaduhan.
