Nagpagawas an Department of Budget and Management (DBM) hin P27.410 bilyon nga kantidad para ha medical assistance ha mga kalbas nga Pilipino ha bug-os nga nasud.
Subay ha ahensya, gagamiton an pondo ha padayon nga implementasyon han Medical Assistance to Indigent and Financially Incapacitated Patients (MAIFIP) Program han Department of Health (DOH).
Ha ilarom han programa, gintatagan hin bulig an mga pasyente nga dire bug-os nga nababayaran an ira gastuson ha pagpapatambal ngan iba pa nga medical services, labi na an pamilya nga nakukurian ha gastuson han ira pagkaka-ospital, medisina, emergency treatment, professional fees ha doktor, ngan iba pa nga panginahanglan ha panlawas.
Dako nga parte gihapon han pondo in mahihingadto ha Centers for Health Development (CHDs) agud suportahan an paghahatag hin medical assistance pinaagi han ira local government hospitals, privately owned institutions, ngan iba pa nga health facilities ha nasud.
Susuportahan gihapon ha pondo an DOH hospital ha Metro Manila ngan iba pa nga rehiyon sugadman an pagpapatuman han eMAIFIP pinaagi han eGovPH superapp.
Sumala kan Budget Secretary Kim Robert de Leon, panuyo han pagpapagawas han nasabi nga pondo nga maihatag an tinuod nga bulig ha hospital level, kun diin dire na kinahanglan saluhon han mga pamilya an gastuson tikang ha ira kalugaringon nga bursa.
