NATIONAL – Igindasig ni Budget Secretary Amenah Pangandaman nga number one an Pilipinas ha budget transparency ha Asia, ha pinakaurhi nga Open Budget Survey.
Ginpahayag han sekretarya nga ha nasabi nga survey in nakakuha an Pilipinas hion score rate nga 76.
Mas hitaas kumpra ha target han gobyerno nga 71 ha ilarom han Philippine Development Plan (PDP).
Labot pa hine, nagseserbi na nga leader an Pilipinas ha Open Government Partnership, ha pagbulig hine ha Open Government Partnership International Steering Committee, kumo usa ha mga nasud nga nag-institutionalize han pagigin abri han gobyerno, pinaagi han Executive Order No. 31 nga pirmado ni Pangulong Ferdinand R. Marcos Jr.
Dugang pa ni Pangandaman, hira ha DBM in ginbubuhat an ngatanan agud makabug-os hin culture of transparency and good governance sanglit maupay daw nga balita nga an Pilipinas in nangunguna ha budget transparency ha Asya.
Ha ilarom daw han pagmamangulo ni Presidente Marcos in nagpapabilin an ira pokus para mapabilin an posisyon kumo global leader ha budget transparency.
