NATIONAL–Gintikangan han Department of Agriculture (DA) an brangay-level rollout han P20 kada kilo nga bugas ha Davao City, kumo pagpapahaluwag han programa nga “Benteng Bigas, Meron Na!” han administrasyon.
Syahan nga ginbuhat an distribusyon ha Barangay Matina Crossing ngan ginsundan ha Barangay Tungkulan ha Toril Distric han ika 20 han Pebrero, ha pangunguna ni Assistant Secretary for Agribusiness, Marketing and Consumer Affairs Genevieve Velicara-Guevarra, upod an mga opisyales han barangay ngan tinaglawas han National Food Authority (NFA) ngan Food Terminal Corporation (FTI).
Sumala kan Guevarra, importante an aktibo nga partisipasyon han local nga pangobyernuhan agud nga masigurado nga maka-abot an subsidized rice ha mga target nga benepisyaryo sugad hiton mga indigent, senior citizen, persons with disabilities, minimum wage earners, ngan solo parents. Dugang pa hine nga nakabulig an P20 Benteng bigas masterlist registry system, usa nga online registry han mga benepisyaryo agud nga igpadagmit an beripikasyon ngan pagpalit hin bugas.
Gineksplikar han DA nga napapanahon an pagpapahaluwag han distribusyon mahitungod nga puno an mga bodega han NFA.
Ha pinaagi han mas madagmit nga pagpapagwas hin suplay ha mga barangay, naiibanan an sulod han mga warehouses ngan naghahatag hin dalan an nagpapadayon nga pagpalit hin palay tikang ha mga lokal nga parag-uma.
Target han pangobyernuhan nga maka-benepiosyo an kutob 60-M ka Pilipino ha programa yana nga tuig, ngan plano nga igpadayon ine hasta Hunyo 2028.
