TACLOBAN CITY – Gindumara kakulop nga adlaw, Marso 31, an Culmination Program han Bureau of Fire Protection Region 8 kumo paghuhuman han Fire Prevention Month ha bulan han Marso.
Ha nasabi nga aktibidad, gintagan hin pagkilala an pira nga fire officials sugadman an mga nagdaog han magkaduru-dilain nga paisan-isan nga gindumara ha bug-os nga bulan han Marso.
Nagpasalamat naman hi Bureau of Fire Protection Region 8 Regional Director, FCSupt. Adel de Paz Bautista ha mga opisyal nga bumulig ha mga gindumara nga aktibidades.
Gintagan-duon gihapon ine an importansya han pagigin mahirot ha kalayo ngan kun patiunan-o makakalikay ha sunog dire la ha panimalay, kundi hasta gihapon ha mga opisina, panarabahuan, ngan pampubliko nga lugar.
Dugang pa ni Bautista, an Fire Prevention Month in usa nga pamaagi agud mapukaw ngan maghatag hin hibaro ha mga katawhan ha kadelikaduhan nga durot han sunog, patiunan-o ine malilikayan, ngan kun anu an bubuhaton ha oras han sunog.
Ha paghuhuman han programa, nagpasalamat an bug-os nga Bureau of Fire Protection Region 8 ha ngatanan nga naghatag hin suporta ngan kooperasyon ha Fire Prevention Month.
Ginsigurado gihapon han ahensya nga magpapadayon an ira paningkamot ha pagpasamwak han mga impormasyon ha publiko ngan pagpatuman han mas epektibo nga mga fire safety measures ha rehiyon. (via Bombo Shiela Encio)
