TACLOBAN CITY – Gin paangbit han City Social Welfare and Development Office (CSWDO) an mga aktibidad nga pagbubuhaton kutob Abril 26 kasumpay han pagsalin-urog han National Solo Parent Week.
Lakip han mga aktibidades in amo an One Stop Shop Caravan ngan an Solo Parents Get Together nga aatendiran han mga solo parent ha syudad.
Sumala kan CSWDO Family and Community Welfare Program Focal Person, Jo-Ann Luna, an solo parent in amo an usa nga nanay o tatay nga naghahatag hin bug-os nga pag-ataman ngan responsibilidad ha ira mga anak nga may-edad 22 anyos paubos.
Ginpahayag liwat han opisina nga kun usa ka nga nanay nga ginbayaan han imo asawa – kasag man o dire – basta ikaw an responsable ha pagbuhi ngan pag-ataman han imo anak, in pwede ka ma-qualify nga solo parent.
Labot la han kaso han pagka-abandona, may-ada pa gihapon iba-iba nga kategorya o sitwasyon nga ginkukonsiderar basi mahingadayan nga usa ka nga solo parent.
Gin-aaghat naman an publiko nga kumadto ha opisina han CSWDO basi masabtan kun kwalipikado ba hira, kay ginkikinahanglan gihapon an validation han ira estado.
Ginpasabot gihapon han CSWDO an mga benepisyo nga pwede matagam-taman han mga kwalipikado nga solo parent, sugad han mga assistance ngan serbisyo tikang ha lokal nga gobyerno.
An tema han selebrasyon yana nga tuig amo an “Solo Parent nga Rehistrado sa Gobyerno, Tiyak na Suportado.”
Gin-aaghat gihapon han CSWDO an ngatanan nga solo parent nga diri mag-alang pagbisita ha ira opisina ngan magparehistro basi makuha an mga pribilehiyo ngan suporta nga angay ha ira. (via Bombo Shiela Encio)
