(WESTERN) SAMAR – Gin bisita han nga cruise ship nga Heritage Adventurer an probinsya han Samar kun diin kun ine an syahan nga higayon nga bumisita na nasabi nga cruise ship ha Sinirangan Bisayas, partikular na ha Samar, ngan ika-tulo pala kabeses ha bug-os nga Pilipinas.
Sumala kan Department of Tourism Eastern Visayas Regional Director, Karen Tiopes, ine in talagsaon nga panhitabo mahitungod nga ine an syahan nga higayon nga ginbisita hin usa nga cruise ship an probinsya han Samar.
Kaurugan manggud nga ginbibisita han mga langyawanon in an Biliran, Southern Leyte, Northern Samar, ngan iba pa nga probinsya ha rehiyon.
An nasabi nga barko in mayda sakay nga 113 nga langyawanon kun diin ha nasabi nga ihap, 107 an lumusad kaupod an 18 nga membro han crew para han shore excurcion activities han Samar.
Ginbisita han mga ine an Paranas Eco-Trail and Birding Site nga nasasakop han Samar Island Natural Park headquarters ha bungto han Paranas.
Katunga naman han 107 nga ihap an sumaka ha nasabi nga trail ngan nagpabilin naman an iba ngan dumiretso ha orchidarium ngan Arboretum, natural park nga mayda mga tanom nga magkaduru-dilain nga klase hin kahoy.
Labot pa hine in bumisita gihapon an mga ine ha Kandiwata Rock Formation ha Daram, Samar para unta mga snorkeling pero mahitungod nga mauran-uran an panahon ngan dire klaro an mga corals mahitungod nga malubog an tubig in naglibot nala an mga ine.
Samtang, gin dayaw naman han mga turista an kahusay ngan ekspersyensya nga ira naabat ha nagin pagbisita han mga ine ha probinsya han Samar.
