TACLOBAN CITY – Patay an usa nga estudyante han Visayas State University ha Baybay, City mahuman nga pagpusilon hin waray pa kakikilal-i nga suspek ha ha usa nga vulcanizing shop ha Brgy. Guadalupe ha mao nga syudad.
Ginkilala an biktima nga hi Ronie Recilla, 24 anyos an pangidaron, Computer Science student ha mao nga unibersidad, nagdakoha Carmen, Agusan Del Norte ngan temporaryo nga nag-ukoy ha Brgy. Guadalupe, Baybay City.
Sumala han usa ha mga classmate ngan kaanak han biktima nga hi Jake Vincent Taglucop, nalingkod ha gawas han vulcanizing shop an biktima han tigda nala ini hiya nga pagpusilon.
Nakadto naman ha sakob hi Taglucop han makabati hin tulo nga buto hin pusil.
Nakaangkon naman hin mga igo ha magkadirudilain nga parte han lawas han biktima nga naging rason han pagkamatay hini.
Ha pagkayana in padayon pa an ginbubuhat nga imbestigasyon bahin han motibo han mao nga insidente.
