TACLOBAN CITY – Nagdumara an Comelec Tacloban hin final testing and sealing ha mga Automated Counting Machine (ACMs), nga gagamiton agud nga masigurado nga waray magigin aberya ha maabot nga piniliay.
Maabot naman ha 37 nga mga polling centers an gin-alutaga hiton Comelec Tacloban nga gagamiton ha May 12 election.
Gintambungan naman ine han pira nga mga volunteers tikang ha magkalain-lain nga barangay ha Tacloban.
Maikokonsidera naman nga madagmit nga proseso an nasabi nga final testing and sealing han nasabi nga mga ACMs.
Sumala kan Imelda Bacasno, Electoral Board, ginsisigurado nira nga magigin madagmit ngan masayon para ha mga botante an paggamit hiton ACMs.
Ha lain nga bahin, naka deploy naman an sobra 782 nga Tacloban PNP personnel ha tanan nga mga polling centers agud nga siguraduhon nga magigin mahimyang an pagdudumaraon nga election.
Nagpahinumdom naman an Comelec ha nagtitikharani nga election nga bomotos hin sayo agud nga malikayan nga pumila hin hilaba, kun diin magtitikang an panbotos alas 5 hiton aga kutob alas 7 hiton gabi.
