Igin eksplikar ni Commission on Elections (COMELEC) Chairman George Erwin Garcia an rason kun kay ano nakasuold an St. Timothy Construction kumo kaparte han Miru Joint Venture ha kaluyo han mga report nga ine in may-ada mga dummy incorporators.
Manunumduman nga usa ha mga ngaran naisumpay ha St. Timothy Construction in hi Sarah Discaya, anay kandidato ha pagka-alkalde han Pasig City. Labot hine, konektado daw gihapon ine ha usa pa nga kumpanya—an St. Gerard Construction.
Mahitungod hine, utro nga nabuhi an mga istoryahon kasumpay ha integridad han mga kumpanya nga nakibulig ha dagko nga proyekyo ngn joint ventures. Iginduon gihapon ni Garcia nga trabaho han COMELEC nga siguraduhon nga an ngatanan han kaapi in nagsusunod ha ginpapatuman nga regulasyon ngan dire ginagamit an mga dummy incorporators agud makalusot ha mga ginpapatuman nga limitasyon ha balaod.
Dugang pa han opisyal, padayon nga papanginanuon han komisyon an nasabi nga mga kumpanya nga joint venture agud masigurado nga waray anomaliya ngan mapabilin an pagtapod han publiko ha proseso.
