NATIONAL – Bisan paman kun dire pa gud ginbabawal an paggamit han artificial intelligence para ha pangangampanya ha 2025 midterm elections, in ginsigurado ni COMELEC Chairman George Garcia nga babantayan han komisyon an paggamit han mga kandidato ha nasabi nga teknolohiya.
Ha pagdungog han Senate Subcommittee on Finance ha 2025 proposed budget han Comelec, gin pakianhan ni Senator Francis Tolentino an Comelec chair kabahin ha susundon nga aludayday ha digital election campaigns.
Baton naman ni Garcia, lilikayan han komisyon nga magamit an AI ha mga serye han misinformation, disinformation, ngan fake news ha panahon han pangangampanya.
Mahitungod hine, kinahanglan daw yaknon o aminon han mga kandidato kun gumamit an mga ine hin AI kaupod na an partikular nga teknolohiya nga gingagamit.
Kinahanglan daw gihapon ig disclose an mga social media accounts ngan iba pa nga mga digital platforms han mga kandidato agud matudlok an pagigin lehitimo han source.
