DOLORES, EASTERN SAMAR – Usa nga coach ha Eastern Visayas Regional Athletic Association (EVRAA) 2025 tikang ha Ormoc City Division an ginbawian hin kinabuhi mahuman nga atakehon ha kasing-kasing.
An biktima in usa nga trainer han baseball team ngan driver han Ormoc City Division.
Sumala kan Department of Education-Eastern Samar Division Information Officer, Abner Aclao, mayda nagchat ha ira group chat (GC) kun diin nangangaro hin medical assistance an Ormoc City Division.
Kumo host division, dagmit ine nga nagtawag han ira medical officer nga nakaduty agud dayun nga magresponde.
Dayun naman nga ginkadto an biktima pero waray na ine mahiabti han medical officer mahitungod nga gindara na an biktima ha usa nga private hospital ha Dolores.
Samtang, subay ha incident report nga gin publiko han usa nga netizen, usa nga grupo hin atleta an ngaro hin bulig haa Health Emergency Management Services Medical Station agud igpahibaro an nahitabo ha ira coach.
Kun diin, pag-abot han mga reponders ha billeting room, nahikit-an an biktima nga nalingkod ha usa nga stool ngan waray malay.
Dayun naman nga ginkita an pulso ngan paghinga han biktima pero dire maupay an kabutang hine, sanglit dayun ine nga gindara ha usa nga private hospital.
Pasado alas-11 han gab-i han Pebrero 20, pira kaoras mahuman ine nga madara ha private hospital in gin deklara ine nga ginbawian na han kinabuhi.
