TACLOBAN CITY – Nagdudumara hin clearing operations an buhatan han Market Operations ha mga ambulant vendors nga nahihimo na nga kompetensya han mga stall owners.
Sumala kan Market Superintendent Danilo Alajas, amo ine an primero nga gintutukan tikang han ginmangulohan niya an buhatan dida pa han Agosto, kaupod gihapon han iya gintutukan an kalimpyo ngan an pagpaukoy han pira nga dire maupay nga buruhaton han pira nga manirinda nga namumutang ha pinakadako nga merkado han syudad.
Dida pala han nakalabay nga semana nagdumara hira hin clearing operation han Fish Port ha panuyoan nga magin maupay an operasyon hine dinhe para han mga namemerkado.
Samtang, gin-aghat gihap han opisyal an mga mamaralit nga dire mag-alang dumaop ha iya buhatan bahin hin mga reklamo bahin ha merkado publiko kay ira ine aaksyunan.
Mahugot daw gihap nira nga gin-momonitor an presyo han mga panguna nga papliton kada semana kaupod an pira nga ahensya han gobyerno sugad han Department of Trade and Industry.
