TACLOBAN CITY – Titikangan na han Tacloban City Veterinary Office an ira mga nakalatag nga aktibidad ngan programa yana nga bulan kadungan han pagsalin-urog han Rabies Awareness Month.
Sumala kan Dra. Eunice Alcantara, head han Tacloban City Veterinary Office, parte han ira mga aktibidad an pagdumara hin libre nga mass anti-rabies vaccination kun diin an ira team mismo an magbabalay-balay ha panbakuna.
Libre gihapon an ira pagbubuhaton nga pamisit o neuter ngan spay o pagligate han mga ayam ha syudad.
Labot la han mga ini, in kaparte gihapon han mga nakalatag nga aktibidad han city veterinary office yana nga bulan an ira dog impounding activities ngan information and education campaign.
Yana nga maabot nga Marso 31 in magkaada hin pamisit, panligate, mass vaccination, ngan deworming an city veterinary office ha CEO Gym City Engineers office tikang alas 8:30 hiton aga kutob alas tres hiton kulop.
Kinahanglan naman nga igparegister han mga pet owners an ira mga alaga nga ayam ha facebook page han Tacloban City Veterinary Office agud nga maakomodar an mga ini.
